Mondolini Ong'baani:
Mana Marak aro uni jikgipa Chengre Gitel Jisu Kristoko bebera·e napbole Kristian ong·na tariengon uamangni chawari Namrini segipa Singran Marak-de Isolni gimin mamung gisiko nangani aro una kenanian dong·jaengachim.Indake uamangni chawari gisiko nangjaoba uamang an·tangtangni bebera·atangoni an·piljaha, batesa uamangni bebera·ani salsana bate bate Isolni Gisik Rong·talgipani dilanio batrikrikaha. Indake uamangni nokdangoni sakgni Mana Marak, aro uni demechik Mingje K.Sangma apsan tariko napbolaha. Uamangni napbolani bidingo tariko adita dingtanggrikani gnang. Ma·pangma Boldamgre Mondoli Nogorpara Mondolina Roll Segate on·gipa gitade 18th December 1890 bilsio napbolaha. Uamang Dr.E.G.Philip Saheb-ni jakchin napbolatako man·na nanga. Maina Boldamgre Mondolini skanggipa napbolchenggiparango sak-17 manderang napbolaha uamangonin sak-6 de Nogorpara Mondolioni napbolchenggiparang ong·na nanga. Ua apsan tarikon, chongmotan 18th December 1890-o Boldamgre Mondoli skanggipa napbolgiparangba Dr.E.G.Philip Sahebni jakchin napboltokaha. Uamangni napbolani apsan salon Nogorpara Mondolioni sakdok napbolpaaha.Uamangara: -
1. Mana Ch.Marak,
2. Mingje K.Sangma,
3. Ramdon Ch.Marak,
4. Hajo Marak,
5.Ronang Marak ,
6. Korok Sangma.
Mondoli Ong'baani Pangchakani:
Boldamgre uan Nogorparaoni 10 km chelao ong'achim aro unbaksa Nama Kattako Knakugijagipa manderang bangbeachim. Unigimin Isolko olakkina reangna aro Nama Kattako gipatna neng'nikanirang dong'ani a'sel 1960 bilsi mango gital mondoliko songe ra'na tik ka'e chanchirime kamrangko ka'aha. Boldamgre Baptist Mondoliba kusi ong'bee, ABDK tom'aniona namnikpaaniko see u'iataha. ABDK 1962 bilsio delegate meetingo Nogorpara Baptist Mondoliko song'na namnike ra'chakaha. Rev.Ringdon S.Sangma Babelapara Mondolini Pamong ABDK-ni representative ong'e Rev.Gadasing M.Marak Magipa Boldamgre Mondolini pamongni mikkango 21st January 1962 bilsio Nogorpara Mondoliko song'aha.
